Dagur íslenskrar náttúru - Yngsta stig (1.- 4. bekkur)

Höfundur

Höfundur er Brynja Stefánsdóttir, verkefnastjóri Gáranna, brynja@geocamp.is

Markmið

Verkefnin eru hugsuð sem tenging við DÍN (Dag íslenskrar náttúru) og eru sett þannig upp að þau virki sem kveikja tengd náttúru og átthögum. Verkefnin eru stutt og einföld í notkun en með hverju fylgir hugmynd að hæfnviðmiði og hvernig má vinna áfram með verkefnið þegar inn er komið.

Aldurshópar

1. - 4. bekkur grunnskóla

Tímalengd

Verkefnið er stutt, um 40 mínútur ættu að duga, allt eftir hvernig hópurinn er samsettur og áhugi þeirra er.

Staðsetning

Hvar sem finna má nægilegt magn af tveimur ólíkum lausum náttúruefnum, til dæmis á skólalóð, í nærumhverfi eða á útinámssvæði.

1. Náttúrulitirnir okkar

Staðsetning: Skólalóð eða næsta nágrenni

Markmið

Að nemendur skoði nærumhverfi sitt af athygli, taki eftir fjölbreytileika náttúrunnar og æfi sig í að lýsa því sem þeir sjá.

Undirbúningur kennara

Enginn sérstakur undirbúningur er nauðsynlegur. Gott er að ákveða fyrirfram á hvaða svæði nemendur mega leita.

Verkefnið

Farið út og skoðið litina sem finnast í náttúrunni í kringum skólann. Kennari gefur nemendum mismunandi leitarverkefni, til dæmis:

• Finnið eitthvað grænt.
• Finnið eitthvað gult.
• Finnið eitthvað brúnt.
• Finnið þrjá ólíka græna liti.
• Finnið eitthvað sem hefur fleiri en einn lit.
• Finnið lit sem erfitt er að nefna.

Lokaumræða / vangaveltur

Ræðið saman:

• Hvaða lit sáum við mest af?
• Voru fleiri litir í náttúrunni en við áttum von á?
• Eru allir grænir litir eins?
• Myndu sömu litir sjást hér á öðrum árstíma?
• Hvaða litur kom okkur mest á óvart?

Framhald inni í stofu

Nemendur geta:

• teiknað litakort af náttúrunni sem þeir sáu,
• flokkað litina í heita og kalda liti,
• búið til sameiginlega „litapallettu náttúrunnar“,
• skrifað eitt eða tvö orð við hvern lit sem lýsa því sem þau fundu,
• borið saman liti milli árstíða síðar á skólaárinu.

Hæfniviðmið – Náttúrugreinar

2. Náttúrubingó án blaðs

Staðsetning: Skólalóð eða næsta nágrenni

Markmið

Að efla athygli nemenda á náttúrulegu umhverfi og eiginleikum þess og hvetja þá til að skoða það með mismunandi skynfærum.

Undirbúningur kennara

Enginn sérstakur undirbúningur er nauðsynlegur.

Verkefnið

Farið út á afmarkað svæði og reynið að finna:

• eitthvað mjúkt
• eitthvað hart
• eitthvað sem hreyfist
• eitthvað sem hefur vaxið
• eitthvað sem vindurinn getur hreyft
• eitthvað með sérstaka lykt
• eitthvað mjög lítið
• eitthvað sem gæti verið eldra en þið sjálf
• eitthvað lifandi
• eitthvað sem ekki er lifandi en skiptir lífverur máli

Ekki þarf að safna hlutunum. Það nægir að finna þá, skoða og sýna öðrum.

Lokaumræða / vangaveltur

Ræðið saman:

• Hvað var auðveldast að finna?
• Hvað var erfiðast?
• Fundu allir hóparnir sömu hlutina?
• Hvaða hlutur passaði við fleiri en eina lýsingu?
• Hvað kom ykkur mest á óvart?

Framhald inni í stofu

Nemendur geta:

• teiknað einn af hlutunum sem þeir fundu,
• búið til eigið náttúrubingó fyrir annan bekk,
• flokkað það sem fannst í lifandi og lífvana þætti,
• skrifað lýsandi orð um eitt fyrirbæri,
• búið til sameiginlegt hugarkort yfir það sem fannst.

Hæfniviðmið – Náttúrugreinar

3. Hlustum á náttúruna

Staðsetning: Skólalóð eða rólegt svæði í nágrenni skólans

Markmið

Að nemendur þjálfi athygli og hlustun og læri að greina á milli hljóða úr náttúrulegu og manngerðu umhverfi.

Undirbúningur kennara

Veljið stað þar sem hópurinn getur stoppað á öruggan hátt og verið kyrr í stutta stund.

Verkefnið

Nemendur standa eða sitja kyrrir og hlusta í eina mínútu. Reynið að greina eins mörg mismunandi hljóð og þið getið. Að mínútu lokinni flokkar hópurinn hljóðin í:

• hljóð úr náttúrunni
• hljóð úr manngerðu umhverfi

Lokaumræða / vangaveltur

Ræðið saman:

• Hvaða hljóð var hæst?
• Hvaða hljóð var lægst?
• Hvaða hljóð virtist vera lengst í burtu?
• Hvaða hljóð var endurtekið?
• Heyrðum við eitthvað sem við tökum venjulega ekki eftir?

Framhald inni í stofu

Nemendur geta:

• teiknað einfalt hljóðkort,
• flokkað hljóð í náttúruleg og manngerð,
• skrifað lýsingarorð við hljóðin,
• búið til „hljóðsögu“ úr því sem heyrðist,
• borið saman hljóð á tveimur mismunandi stöðum.

Hæfniviðmið – Náttúrugreinar